Dona Problemas

Miguel López O Hematocrítico é autor de varios blogs humorísticos de éxito e continúa espallando a súa fama en Twitter. Leva colaborado en numerosos medios de comunicación. Ademais, é escritor e mestre de Educación Infantil, Inglés e Primaria. En Xerais publicou os libros «Feliz feroz. O lobiño riquiño» (2016), «Axente Riciños» (2016) e «O lobo con botas» (2018), ilustrados por Alberto Vázquez; «Rapunzel con piollos» (2019), «Alcaldesa vermella» (2020), «Vaia cabuxiño!» (2021) e «Axente Riciños. Misión Princesa» (2022) e «Morto de fame» (2023), ilustrados por Mar Villar; e «A media hora dos recreos» (2020) e «Campións do mundo» (2020), ilustrados por Albert Monteys. En 2021 nace en Xerais a serie Os Hematiños, ilustrada por Alberto Vázquez, que leva catro títulos publicados: «Un can» (2021), «O meu irmono» (2021), «Gaivota gourmet» (2022) e «Oso banda» (2022). Na colección Sopa de Libros é autor da novela «Dona problemas» (2023).

Anaír Rodríguez (Vigo, 1978) licenciouse en Filoloxía Galega pola Universidade de Vigo e traballa dende hai anos como editora, o que compaxina co activismo a prol da lectura na asociación Espazo Lectura, da que é socia fundadora. É coautora de diversos materiais de ensino da lingua galega, tradutora de obras da literatura infantil e xuvenil e autora dos álbums «Pioneiras. Galegas que abriron camiño» (Xerais 2018), ilustrado por Nuria Díaz, e «Pioneiras 2. Galegas que abriron camiño» (Xerais 2019), con ilustracións de Abi Castillo.

Paco Roca (Valencia, 1969) estudou na Escola de Arte e Superior de Deseño da súa cidade natal. Aínda que o seu traballo se centra nos cómics, compaxina o seu tempo coa ilustración e as charlas e obradoiros. Da súa extensísima bibliografía comiqueira, cuxos traballos se traduciron a unha decena de idiomas (entre eles o galego) e foron multipremiados, destacamos «Engurras», Premio Nacional de Cómic 2008, Gran Premio Romics de Roma, Premio Gran Guinigi de Lucca, Excellence Award do Japan Media Art Festival, nomeado aos Premios Eisner. Algúns dos seus cómics foron levados ao ámbito audiovisual, como é o caso de «Arrugas» (Ignacio Ferreras, 2011), que obtivo o Goya á mellor película de animación e o Goya ao mellor guión adaptado, «Memorias de un hombre en pijama» ou «El tesoro del Cisne Negro», convertido en serie de televisión («La Fortuna») dirixida por Alejandro Amenábar. En 2021 foille outorgada a Medalla de Ouro ao Mérito nas Belas Artes. En Xerais, é autor das ilustracións do libro infantil «Dona Problemas» (2023).